8 oyda 47,2 trln so‘m tushum davlat budjetiga o‘tkazildi – Bojxona qo‘mitasi
Yashirin iqtisodiyotga qarshi kurashda qariyb 790 mlrd so‘mlik noqonuniy tovarlar ushlab qolindi.
Davlat bojxona qo‘mitasida 2025-yilning yanvar–avgust oylarida amalga oshirilgan chora-tadbirlar yuzasidan brifing bo‘lib o‘tdi. Unda Jamoatchilik va OAV bilan aloqalar bo‘limi boshlig‘i H.Tangriyev ma’lumot berdi.
Hisobot davrida chegara-bojxona postlari orqali 1,1 mln.dan ortiq yuk avtotransport vositasi va yarim milliondan ko‘proq yuk vagonlari harakatlangan. Yo‘lovchilar oqimi esa 41 mln nafardan oshgan. Shu bilan birga, 742 mingdan ziyod bojxona yuk deklaratsiyalari rasmiylashtirilgan.
Mamlakat budjetiga 47,2 trln so‘m bojxona to‘lovlari o‘tkazilib, reja 101,2 foizga bajarildi. Shuningdek, tadbirkorlarga 36,2 trln so‘mlik bojxona imtiyozlari qo‘llanildi, 350 dan ortiq subyektga 3,7 trln so‘m to‘lovlarni kechiktirib to‘lash huquqi berildi.
Yashirin iqtisodiyotga qarshi kurash doirasida 27 mingdan ortiq qonunbuzarlik aniqlanib, 789 mlrd so‘mlik noqonuniy tovarlar, jumladan, valyuta qimmatliklari, zargarlik buyumlari va tamaki mahsulotlari musodara qilindi. Bundan tashqari, bojxonachilar 1,3 tonnadan ortiq giyohvandlik vositalari va psixotrop moddalar, shuningdek, noqonuniy qurollar va patronlarni ham ushlab qolishga muvaffaq bo‘ldi.
