BMT Bosh Assambleyasi Falastin davlatini tan olishga doir deklaratsiyani ma’qulladi
Deklaratsiyada G‘azo urushini to‘xtatish, XAMAS hukmronligini tugatish va mustaqil Falastin davlatini barpo etish zarurligi qayd etildi.
Birlashgan Millatlar Tashkiloti Bosh Assambleyasi 12-sentabr kuni bo‘lib o‘tgan yalpi majlisda Falastin davlatini tan olish va Isroil–Falastin mojarosini ikki davlat tamoyili asosida hal qilish bo‘yicha muhim deklaratsiyani ko‘pchilik ovoz bilan ma’qulladi.
Deklaratsiyada G‘azo sektoridagi urushni to‘xtatish, XAMASning hududdagi hukmronligini tugatishi, shuningdek, xalqaro hamjamiyat ishtirokida Falastin ma’muriyatiga qurol topshirilishi zarurligi qayd etilgan. Asosiy maqsad – suveren va mustaqil Falastin davlatini barpo etishdir.
Al-Arabiya axborot agentligi bergan ma’lumotga ko‘ra, hujjatni qo‘llab-quvvatlab 142 davlat ovoz bergan, 10 davlat qarshi chiqqan, yana 12 davlat betaraf qolgan.
Mazkur deklaratsiyada xalqaro hamjamiyatning Isroilning G‘azo sektoridagi harakatlariga hamda 2023-yil 7-oktabr kuni XAMAS tomonidan amalga oshirilgan hujumlarga nisbatan qat’iy munosabati bildirildi va ular qoralandi.
Qayd etilishicha, yetti sahifadan iborat bo‘lgan hujjat o‘tgan yil iyul oyida Saudiya Arabistoni va Fransiya tashabbusi bilan BMTda tashkil etilgan xalqaro konferensiya natijasi hisoblanadi.
