Namanganda VIII asrga oid noyob qoʻlyozma va tangalar topildi
Topilmalar orasida Abbosiylar davri tangalari va ilmiy qoʻlyozmalar ham bor.
Namangan viloyatidagi Axsikent arxeologiya parki tarkibidagi “Yangi Axsi” majmuasida qadimiy boyliklar topildi. Fond 68 ta yangi tanga va 27 ta kitob bilan boyidi. Bu haqda viloyat hokimligi axborot xizmati xabar berdi.
Topilmalar orasida VIII asrda Abbosiylar hukmronligi davrida zarb etilgan kumush tangalar hamda arab yozuvida bitilgan noyob qoʻlyozma mavjud. Qoʻlyozmada handasa, riyoziyot, ilmi nujum va tibbiyotga oid bilimlar jamlangan.
Shuningdek, fondga Somoniylar va Qoraxoniylar davriga oid, shuningdek, 1667–1670-yillarda Shvetsiya va 1836-yilda Buyuk Britaniyada zarb etilgan tangalar ham qoʻshildi. Bu yodgorliklar tarixiy merosni yanada boyitishi kutilmoqda.
Ayni paytda Axsikent arxeologik ekspeditsiyasi Umarshayx Mirzoning rezidensiyasi boʻlgan Yakqayigit bogʻida qazish ishlarini davom ettirmoqda. Mutaxassislarning aytishicha, bu hududdan yana ko‘plab tarixiy topilmalar aniqlanishi mumkin.
