Qashqadaryoda bolani urib ketmoqchi bo'lgan Damas haydovchisi ushlandi
68 yoshli Damas haydovchisi aniqlanib, unga nisbatan ma’muriy ish qo‘zg‘atilgan.
11-sentabr kuni Shahrisabz shahrida piyodalar yo‘lakchasidan o‘tayotgan o‘quvchiga yo‘l bermagan Damas haydovchisi yo‘l harakati xavfsizligi qoidalarini qo‘pol ravishda buzdi. Hodisa tasvirlangan videolavha ijtimoiy tarmoqlarda keng muhokamaga sabab bo‘ldi.
Videoda bola yo‘ldan o‘tayotganda boshqa mashinalar to‘xtagani, biroq Damas haydovchisi harakatni davom ettirgani ko‘rinadi. O‘quvchi mashinani ko‘rib yugurishga urinib yiqilib tushgan, avtomobil esa katta tezlikda uning yonidan o‘tib ketgan. Yaxshiyamki, bola jiddiy jarohat olmagan.
YHXX axborot xizmati ma’lum qilishicha, 68 yoshli haydovchi aniqlanib, unga nisbatan ma’muriy ish qo‘zg‘atildi.
Shahrisabz shahri sudi qoidabuzarga BHMning 25 baravari miqdorida (10,3 mln so‘m) jarima belgiladi va uni bir yil muddatga transport boshqarish huquqidan mahrum qildi. Mutasaddilar hodisa yo‘llarda piyodalar, ayniqsa, bolalar xavfsizligini ta’minlash masalasi yanada dolzarb ekanini ta’kidlashmoqda.
