Namananganda 7,2 mlrd so‘mlik kontrafakt dori ombori fosh etildi
DXX aniqlangan holat yuzasidan Zamon.uz’ni xabardor qildi.
Davlat xavfsizlik xizmati xodimlari tomonidan Namanagan viloyat bojxona boshqarmasi hamda Iqtisodiy jinoyatlarga qarshi kurashish departamenti vakillari ishtirokida o‘tkazilgan tezkor tadbirda noqonuniy farmatsevtika savdosi bilan shug‘ullanayotgan shaxslar faoliyati fosh etildi.
Ushbu tadbir davomida Uychida yashovchi 1985, 1992 va 1993-yillarda tug‘ilgan uch nafar fuqaro o‘zaro til biriktirib, sifatsiz va rasmiy sertifikatsiz dori vositalarini yashirin omborlarda saqlab, savdoga tayyorlab kelgani aniqlandi.
Namanagan shahri va Uychi tumanidagi besh manzilga joylashtirilgan yashirin omborlar ko‘zdan kechirilganda, Xitoy, Rossiya, Hindiston, Fransiya, Italiya, Turkiya, Vetnam, Isroil, Polsha, Ukraina, Germaniya va boshqa davlatlarda ishlab chiqarilgan, hech qanday hujjatlarsiz 1 267 turdagi jami 102 640 dona quti dori vositalari borligi aniqlandi. Ularning umumiy qiymati 7,2 milliard so‘mga tengligi qayd etildi.
Shuningdek, noqonuniy mahsulotlar orasida kuchli ta’sir qiluvchi “Testosteron” va “Retabolil” kabi preparatlar ham mavjudligi ma’lum bo‘ldi.
O‘tkazilgan tergovoldi surishtiruv natijalariga ko‘ra, dori vositalari mamlakatimizga Qirg‘iziston Respublikasidan noqonuniy yo‘llar orqali olib kirilgani aniqlangan.
Mazkur holat yuzasidan Jinoyat kodeksining 186-3 va 251-1-moddalari bo‘yicha jinoyat ishi qo‘zg‘atish rejalashtirilgan. Hozirda tergovga qadar surishtiruv ishlari olib borilmoqda.
