Namanganda poyezd Gentra’ni urib yubordi, 6 kishi halok bo‘ldi
Avtomobil haydovchisi qoidalarni buzgan va poyezd yaqinlashayotganiga qaramay temiryo‘lni kesib o‘tishga uringan.
13-sentyabr kuni Namangan viloyatining Chortoq tumanida og‘ir yo‘l-transport hodisasi sodir bo‘ldi. Bu haqda “O‘zbekiston temir yo‘llari” AJ matbuot xizmati xabar berdi.
Ma’lum qilinishicha, Chortoq–Uychi bekatlari oralig‘idagi qo‘riqlanmagan temiryo‘l kesishmasida Gentra rusumli yengil avtomobil poyezd bilan to‘qnashgan. Dastlabki tergov materiallariga ko‘ra, avtomobil haydovchisi yo‘l harakati qoidalarini buzib, poyezd yaqinlashib kelayotganiga qaramay temiryo‘lni kesib o‘tishga uringan.
Avtomobil ichida jami olti kishi bo‘lgan — besh nafar ayol va bir nafar voyaga yetmagan bola. Kuchli zarba oqibatida barcha yo‘lovchilar voqea joyida halok bo‘lgan.
Poyezd mashinistlari to‘satdan vaziyatni ko‘rib, shoshilinch tormoz qo‘llashgan. Biroq katta tezlik sababli hodisaning oldini olishning imkoni bo‘lmagan. Poyezdga yengil texnik zarar yetgan.
