Shimoliy Koreyada xorijiy seriallarni tomosha qilganlar qatl qilinadi
BMT hisobotiga ko‘ra, Shimoliy Koreyada xorijiy, xususan Janubiy Koreya seriallarini tarqatgan fuqarolar o‘lim jazosi bilan jazolanmoqda.
Birlashgan Millatlar Tashkiloti inson huquqlari bo‘yicha taqdim etgan yangi hisobotida qayd etilishicha, Shimoliy Koreyada xorijiy audiovizual mahsulotlarni, xususan Janubiy Koreya seriallarini tarqatish hamda tomosha qilish keskin jazoga sabab bo‘lmoqda. Hisobotga ko‘ra, mamlakatda ushbu faoliyat uchun o‘lim jazosi qo‘llanilmoqda va bir necha fuqaro sud hukmiga binoan qatl etilgan.
BMTning Shimoliy Koreyadagi inson huquqlari bo‘yicha vakolatxonasi rahbari Jeyms Hinanning ma’lum qilishicha, 2014-yildan buyon mamlakatda kuzatuv texnologiyalaridan keng foydalanilmoqda va ayniqsa COVID-19 pandemiyasidan so‘ng og‘ir jazo choralari kuchaygan. Shu bilan birga, oddiy va siyosiy tusdagi jinoyatlar uchun ham qatl etish holatlari soni ortgani kuzatilgan.
Shu bilan bir qatorda, BMT hisobotida qamoqxona sharoitlarida ayrim zo‘ravonlik holatlari kamaygani, sud-huquq tizimida ayrim islohotlar amalga oshirilayotgani qayd etilgan. Biroq xalqaro tashkilot mamlakatdagi bolalar mehnati masalasidan jiddiy xavotirda. Ma’lumotlarga ko‘ra, o‘smirlar xavfli sanoat tarmoqlarida, jumladan ko‘mir qazib olish va qurilish sohalarida, shuningdek “zarbdor brigadalar” tarkibida majburiy mehnatga jalb qilinmoqda.
