Toshkent viloyati aholisi uchun qulay avtobus xizmati yo‘lga qo‘yiladi

Toshkent shahar transport boshqarmasi jamoatchilik o‘rtasida paydo bo‘lgan savollarga izoh berib, avtobus qatnovlarini poytaxt aglomeratsiyasi va viloyat hududlarigacha uzaytirish ishlari bosqichma-bosqich amalga oshirilayotganini ma’lum qildi.

 

Davlat rahbari topshirig‘iga muvofiq, Toshkent viloyatining barcha shahar va tumanlarini poytaxt bilan uzluksiz bog‘lashga qaratilgan keng qamrovli loyihalar ishlab chiqilmoqda. Mazkur loyihalar tasdiqlangach, belgilangan tartib asosida ochiq elektron tender e’lon qilinadi va g‘olib bilan maxsus burtto-shartnoma imzolanadi.

 

Shuningdek, yo‘nalishlarning uzayishi avtobuslarni kutish vaqtini orttirib yubormasligi uchun qo‘shimcha transport vositalari ajratilishi rejalashtirilmoqda. Bu chora transport tizimi barqarorligi va xizmat sifatini ta’minlashga xizmat qiladi.

 

Ayni paytda yo‘l infratuzilmasini yaxshilash, xavfsizlikni mustahkamlash, texnik va tashkiliy masalalarni hal qilish ishlari davom etmoqda. Muhandislik va loyiha guruhlari aglomeratsiyaning barcha hududlarida logistika jarayonlarini o‘rganmoqda.

 

Poytaxt va uning atroflarida yagona transport tizimi shakllantirilishi natijasida nafaqat shahar markazida, balki viloyatning chekka hududlarida yashovchi aholiga ham qulay, xavfsiz va muntazam jamoat transporti xizmati yo‘lga qo‘yiladi.