Google jurnalistik materiallardan noqonuniy foydalangani uchun sudga berildi

Rolling Stone, Billboard va Variety kabi nashrlar egasi Penske Media kompaniyasi Google’ni Vashingtondagi federal sudga berdi. Daʼvoga ko‘ra, texnologiya giganti o‘zining sunʼiy intellekt tizimlari orqali jurnalistik materiallardan ruxsatsiz foydalanib, nashriyotlarning rasmiy saytlariga tashriflar sonini keskin kamaytirmoqda. Bu haqda CNN xabar bermoqda.

 

Mazkur sud ishi Google (Alphabet) kompaniyasiga qarshi shu turdagi birinchi daʼvo hisoblanadi. Nashriyotlar bir necha oydan beri Google’ning yangi “AI umumiy maʼlumotlar” funksiyasi ularning saytidan auditoriyani tortib olayotgani, buning oqibatida reklama va obuna daromadlari kamayayotganini taʼkidlab kelmoqda.

 

Penske Media’ning qayd etishicha, Google faqat AI xulosalarida maqolalari ishlatilgan taqdirdagina qidiruv natijalarida ularning saytlariga havola beradi. Aks holda, Google nashriyotlarga o‘z kontentlaridan foydalanish huquqi uchun haq to‘lashi lozim edi. Kompaniya buni Google’ning qidiruv bozoridagi hukmron mavqeidan foydalanish sifatida baholamoqda. Federal sud qaroriga ko‘ra, Google AQSh qidiruv bozorining qariyb 90 foiziga egalik qiladi.

 

Daʼvoda keltirilishicha, Penske Media saytlariga tashrif buyuruvchilarning qariyb 20 foizi hozirda AI orqali shakllangan sharhlar sabab kamaygan va bu ulush yanada ortishi mumkin. 2024-yil oxiriga borib, kompaniya daromadlari uchdan bir qismidan ko‘prog‘iga qisqargani taʼkidlangan.

 

Google esa o‘z pozitsiyasida turib, “AI Overviews” qidiruv tizimini foydalanuvchilar uchun yanada samarali qilishi, kontentni topish imkoniyatlarini kengaytirishini bildirgan. Kompaniya o‘ziga qarshi qo‘yilgan daʼvolarni asossiz deb baholab, sudda o‘zini himoya qilishini maʼlum qilgan.