Namangan aholisi millionlik shahar darajasiga yetmoqda

Namangan aholisi yaqin orada million nafardan oshadi. Shu bois shahar infratuzilmasini kengaytirish, jumladan, maktabgacha ta’lim muassasalarini ko‘paytirish dolzarb masala sifatida qayd etildi.

 

Tadbirkorlar uchun e’lon qilingan imtiyozlardan samarali foydalanib, Namangan shahrida joriy yilda 5 ming, kelgusi yilda esa 15 ming o‘rinli yangi bog‘chalarni tashkil etish rejalashtirilgan.

 

Shu bilan birga, viloyatdagi 49 ta texnikumga xorijiy standartlar olib kelinib, ularning barchasida dual ta’lim tizimini yo‘lga qo‘yish topshirildi.

 

So‘nggi uch oy davomida “Faol hayotga qadam” dasturi doirasida 48 nafar tadbirkor tomonidan 3 mingga yaqin nogironligi yoki yoshi katta bo‘lgan fuqarolarga parvarish xizmatlari tashkil etildi. Natijada 350 nafar aholi doimiy ish bilan ta’minlanib, barqaror daromad manbaiga ega bo‘ldi.

 

Ijtimoiy himoya milliy agentligiga endilikda demensiya va Parkinson kabi kasalliklarga chalingan fuqarolar uchun ham maxsus parvarish xizmatlarini yo‘lga qo‘yish vazifasi yuklatildi.

 

Bundan tashqari, kunduzgi parvarish xizmatlariga qo‘shimcha ravishda nogironligi bor bolalarning funksional imkoniyatlarini oshirishga qaratilgan reabilitatsiya va pedagogik xizmatlarni yo‘lga qo‘yish muhimligi ta’kidlandi.