O‘zbekiston Yaqin Sharqdagi harbiy tajovuzni qoraladi
Shavkat Mirziyoyev sammitga murojaat yo‘llab, davlatlarni tinchlik va birdamlikka chaqirdi.
Doha shahrida o‘tayotgan favqulodda Arab-islom sammitida O‘zbekiston tashqi ishlar vaziri Baxtiyor Saidov Prezident Shavkat Mirziyoyevning ishtirokchilarga yo‘llagan murojaatini yetkazdi.
Murojaatda O‘zbekiston Yaqin Sharqda tinchlik va xavfsizlikka tahdid solayotgan so‘nggi harbiy tajovuzni keskin qoralab, Qatardagi xalq va barcha musulmon mamlakatlari bilan mustahkam birdamlikda ekanini ta’kidladi.
Shuningdek, O‘zbekiston barcha mojarolarni tinch yo‘l va diplomatiya orqali hal qilish zarurligini, xalqaro hamjamiyat zudlik bilan zo‘ravonlikni to‘xtatishi lozimligini bildirdi. Prezidentning ta’kidlashicha, BMT rezolyutsiyalariga muvofiq falastinliklarning mustaqil davlat barpo etish huquqi hurmat qilinishi shart.
Rasmiy Toshkent zarurat tug‘ilganda jabrlanganlarga insonparvarlik yordami ko‘rsatishga tayyorligini ham bildirdi. Bu borada O‘zbekiston ilgari ham falastinlik fuqarolar guruhini qabul qilib, qo‘llab-quvvatlagan edi. Sammit esa mintaqada barqarorlikni ta’minlash uchun birdamlik va qo‘shma qarorlar ishlab chiqishda muhim maydon bo‘lib xizmat qilmoqda.
