“Sertifikat sotgan fermerlarni afv etish imkonsiz” — Qirg‘iziston Soliq xizmati raisi
Qirg‘iziston O‘zbekistonga sertifikat sotgan fermerlarning qarzini kechirmaydi.
Qirg‘iziston Davlat soliq xizmati raisi Almambet Shiqmamatov ayrim fermerlarning qarzlarini kechirish masalasiga oydinlik kiritdi. Uning aytishicha, qoramol uchun sertifikatlarni ommaviy ravishda olib, O‘zbekistonga sotgan tadbirkorlarning qarzdorligi afv etilmaydi.
Shiqmamatovning so‘zlariga ko‘ra, joriy yil yozida deputatlar Davlat soliq xizmatidan yirik qarzga ega chorvadorlarni soliqlardan ozod qilishni so‘ragan. Biroq ularning ayrimlari sertifikatlarni Qishloq xo‘jaligi vazirligi departamentidan katta hajmda sotib olib, keyin qo‘shni davlatga pullagani aniqlangan.
“Bunday fermerlarni qarzdan ozod qilish yoki ularning soliqlarini kechirish mumkin emas”, — deya ta’kidladi Shiqmamatov.
Mazkur masala hozircha jamoatchilik muhokamasida qolmoqda. Deputatlar chorvadorlarning manfaatlarini himoya qilishni istasa-da, soliq idorasi ularning noqonuniy faoliyati tufayli bunday yengillik berishdan bosh tortmoqda.
