1 noyabrdan elektron portaldan olingan maʼlumotlar qog‘oz hujjatga tenglashtiriladi
Mahallalarda aholiga oid ma’lumotlarni yuritish “Raqamli mahalla” platformasi orqali amalga oshiriladi.
O‘zbekistonda elektron davlat xizmatlarini yanada takomillashtirish va aholining ulardan foydalanish imkoniyatini kengaytirish bo‘yicha yangi chora-tadbirlar belgilandi. 2025-yil 16-sentabrda qabul qilingan Prezident qaroriga ko‘ra, “Raqamli hukumat” dasturi doirasida 41 ta ustuvor loyiha amalga oshiriladi hamda elektron xizmatlar ulushi 70 foizga yetkaziladi.
Qarorga muvofiq, 2025-yil 1-noyabrdan mobil aloqa operatorlari, tijorat banklari va to‘lov tashkilotlari mobil ilovalar orqali Yagona portalda pulli davlat xizmatlarini taqdim etadi. 1-dekabrdan esa nodavlat notijorat tashkilotlariga idoralararo raqamli hamkorlik qilish huquqi beriladi.
2026-yildan boshlab fuqarolarning ijtimoiy yordam olish uchun murojaatlari, mahallalarda aholiga oid ma’lumotlarni yuritish va ular bilan ishlash jarayonlari “Raqamli mahalla” platformasi orqali amalga oshiriladi. Shuningdek, nogironlikni belgilash, talabalar uchun uy-ijara to‘lovini qisman qaytarish hamda ta’lim xizmatlarini ko‘rsatish jarayonlari ham elektron tizimga o‘tkaziladi.
