O‘zbekistonda o‘tkir respirator infeksiyalar tarqalishi xavfi mavjud — Sanepidqo‘mita
Eng ko‘p kasallanish 0–1 yoshli bolalar orasida qayd etilmoqda.
O‘zbekiston Respublikasi Sanitariya-epidemiologiya qo‘mitasi ma’lumotiga ko‘ra, mamlakatda o‘tkir respirator infeksiyalar (O‘RI) bo‘yicha epidemiologik vaziyat barqarorligicha qolmoqda.
Rossiya va qo‘shni davlatlarda mavsumiy ko‘tarilish kuzatilayotganiga qaramay, O‘zbekistonda O‘RI kasallanish ko‘rsatkichlari epidemik ko‘p yillik kasallanish ko‘rsatkichidan 36,5 foizga past. Kasallikning chetdan kirib kelishi va tarqalish xavfi mavjud bo‘lgani uchun, aviaqatnovlar, mehnat migratsiyasi va xizmat safarlari doimiy nazorat ostida turibdi.
Gripp va O‘RI viruslarining aylanishini aniqlash maqsadida Sanepidqo‘mita tizimidagi 15 ta virusologiya laboratoriyasida muntazam tadqiqotlar olib borilmoqda. Yosh guruhlari bo‘yicha tahlillarga ko‘ra, eng yuqori kasallanish holatlari 0–1 yoshdagi bolalar orasida qayd etilmoqda.
Mutasaddilar ma’lum qilishicha, hozirgi vaqtda respublika bo‘yicha gripp va O‘RI bo‘yicha epidemiologik vaziyat to‘liq nazorat ostida qolmoqda.
