Toshkent metropolitenida yangi infokioskalar ishga tushirildi
Yo‘lovchilar endilikda infokioska orqali naqd pul evaziga chipta xarid qilishlari mumkin.
Toshkent metropolitenida yo‘lovchilar uchun qulayliklarni oshirish maqsadida zamonaviy infokioskalar joriy etilmoqda. Hozirgi kunda 24 ta qurilma ishga tushirilgan bo‘lib, ular orqali naqd pul evaziga qog‘oz chipta xarid qilish mumkin. Mazkur tizim naqd mablag‘ni o‘zgartirib bermaydi — to‘lovlar yo‘lovchining mobil telefon hisobiga o‘tkaziladi.
Loyiha bosqichma-bosqich kengaytiriladi va yil yakuniga qadar infokioska soni 200 taga yetkazilib, barcha bekatlarda o‘rnatilishi rejalashtirilgan. Kelgusida ular orqali uy-joy kommunal xizmatlari, mobil aloqa to‘lovlari, kartalardan mablag‘ yechish va boshqa interaktiv xizmatlar ham yo‘lga qo‘yiladi.
Mazkur tashabbus ATTO va Toshkent metropoliteni hamkorligida, yetakchi fintech kompaniyalardan biri Alif tomonidan amalga oshirilmoqda.
Ma’lumot uchun, Toshkent metrosida jami 50 ta bekat mavjud bo‘lib, infokioskalar har bir kirish qismida o‘rnatiladi.
Avvalroq metropoliten kassalari qisqartirilishi ortidan ishdan bo‘shagan xodimlar yangi kasblarga qayta tayyorlanishi haqida xabar berilgandi.
