Vladivostokda o‘zbekistonliklarga hujum qilgan ikkinchi shaxs qo‘lga olindi
U 15 yoshli o‘smir bo‘lib chiqdi.
Rossiya Federatsiyasi IIV Primorsk o‘lkasi boshqarmasi ma’lumotiga ko‘ra, jinoyat qidiruv xodimlari Vladivostokda O‘zbekiston fuqarolari bilan bog‘liq mojaro yuzasidan ikkinchi gumonlanuvchini qo‘lga oldi. U 2010-yilda tug‘ilgan voyaga yetmagan o'smir ekani aniqlandi.
Politsiya xabariga ko‘ra, ushbu shaxs bezorilikda gumon qilinib, qo‘shimcha tergov harakatlari o‘tkazish uchun tergov organlariga topshirilgan.
Avvalroq Primorsk o‘lkasi prokuraturasi 10-sentabr kuni kechqurun Xabarovskaya ko‘chasi yaqinida bir guruh o‘smirlar migrantlarga hujum qilgani haqida tekshiruv boshlagan edi. 16-sentabr kuni O‘zbekistonning Vladivostokdagi bosh konsuli Yusup Qobuljonov Rossiya Tashqi ishlar vazirligining hududiy boshqarmasiga murojaat qilib, mazkur masala bo‘yicha zarur choralar ko‘rilishini so‘radi.
Tergov qo‘mitasining dastlabki ma’lumotlariga ko‘ra, o‘smirlar mast holda bo‘lib, transport vositalariga shikast yetkazgan, salon ichiga aerozol purkagan, shuningdek, yuk mashinasi haydovchisi, do‘kondagi xaridor, taksi haydovchisi va yo‘lovchilarga hujum qilgan.
