Afg‘onistonning bir necha hududida internet cheklab qo‘yildi
Balx viloyatida optik internet taqiqlandi, natijada davlat idoralari va xususiy sektor Wi-Fi’dan uzildi.
“Tolibon” harakati rahbari Heybatulloh Oxundzoda “axloqsizlikning oldini olish” maqsadida Afg‘onistonning Balx viloyatida optik tolali internet xizmatlarini taqiqlash to‘g‘risida qaror chiqardi. Bu haqda viloyat hukumati vakili Hoji Attaulla Zayd ma’lum qildi, deya xabar bermoqda Associated Press.
Qayd etilishicha, cheklovlar oqibatida Balxdagi davlat idoralari, xususiy sektor va turar-joylar Wi-Fi tarmog‘idan uzilgan. Hozirda hududda faqat mobil aloqa tarmoqlari orqali internetdan foydalanish mumkin.
Viloyat vakili ehtiyojlarni qondirish uchun muqobil tarmoq tashkil etilishi rejalashtirilayotganini bildirgan. Biroq cheklovlarning boshqa viloyatlarga ham joriy etilishi masalasiga aniqlik kiritilmagan.
Shu bilan birga, Londonda joylashgan Afg‘oniston xalqaro nashri ma’lumotiga ko‘ra, Balxdan tashqari Qandahor, Uruzgon, Hilmand va Nimroz viloyatlarida ham internet xizmatlari uzilgan.
