Putin migrantlar uchun patent tizimini bekor qilishni taklif qildi
Rossiya prezidenti mehnat muhojirlariga oid tartiblarni qayta ko‘rib chiqish zarurligini bildirdi.
Rossiya prezidenti Vladimir Putin mamlakatdagi mehnat muhojirlari uchun amaldagi patent tizimini bekor qilish masalasi muhokama qilinishi kerakligini bildirdi. Bu haqda u Davlat Dumasidagi fraksiya yetakchilari bilan uchrashuvda ma’lum qildi.
“Biz migrantlar uchun patent tizimini bekor qilish haqida o‘ylashimiz kerak. Bu tizim keng qo‘llaniladi. Hech narsani istisno qilmayman”, — dedi davlat rahbari.
Putinning so‘zlariga ko‘ra, migratsiya mavzusi Rossiya fuqarolari uchun “nozik masala” hisoblanadi va federal hamda mahalliy hokimiyat organlari mavjud muammolarni yashirmasdan hal etishi lozim.
Ma’lumot uchun, hozirgi tartibga ko‘ra Rossiyaga vizasiz kiruvchi xorijiy fuqarolar ish faoliyatini amalga oshirish uchun 30 kun ichida patent olishlari shart. Bunda ular ro‘yxatdan o‘tishi, tibbiy ko‘rikdan o‘tishi, rus tili, tarixi va qonunchiligini bilishini tasdiqlashi, shuningdek, belgilangan davlat boji va soliq to‘lovlarini amalga oshirishi kerak.
Patent bir oydan bir yilgacha muddatga beriladi va faqat unda ko‘rsatilgan hudud va faoliyat doirasida amal qiladi. 2025-yil 1-yanvardan boshlab Moskvada patent uchun shaxsiy daromad solig‘ining oylik avans to‘lovi 8 900 rublni tashkil etadi.
Shuningdek, joriy yilning iyulidan boshlab migrantlar uchun rus tili imtihonidagi tinglash va gapirish topshiriqlari murakkablashtirildi, savollar soni ko‘paytirildi hamda minimal o‘tish ballari belgilandi.
