Saida Mirziyoyeva JST rahbari bilan uchrashdi
Jenevada O‘zbekistonning JSTga qo‘shilish jarayoni muhokama qilindi.
17 sentabr kuni O‘zbekiston Prezidenti Administratsiyasi rahbari Saida Mirziyoyeva Jenevada Jahon savdo tashkiloti (JST) Bosh direktori Ngozi Okonjo-Iveala bilan uchrashdi. Bu haqda Mirziyoyeva o‘zining ijtimoiy tarmoqdagi sahifasida xabar berdi.
“Muloqot davomida yurtimizda amalga oshirilayotgan tub islohotlar, JSTga a’zo bo‘lish yo‘lidagi yangi ehtimoliy qiyinchiliklar hamda ishonch va hamkorlikning muhim ahamiyati haqida ochiq fikr almashdik”, — deya yozdi Saida Mirziyoyeva.
U shuningdek, Ngozi xonimga yetakchilik va doimiy qo‘llab-quvvatlovi uchun minnatdorlik bildirganini ta’kidladi. Mirziyoyeva qayd etishicha, jahon savdosining muhim davrida O‘zbekiston islohotlar doirasida o‘z majburiyatlarini qat’iyat bilan bajarishda davom etadi.
Eslatib o‘tamiz, bu Saida Mirziyoyevaning JST rahbari bilan ilk uchrashuvi emas. O‘tgan yili u Toshkentdagi xalqaro konferensiya va Jenevadagi muloqotlar chog‘ida ham Ngozi Okonjo-Iveala bilan yuzma-yuz uchrashgan edi. Shu bilan birga, 2025-yil davomida O‘zbekiston JSTga qo‘shilish bo‘yicha bir qator ikki tomonlama muzokaralarni — jumladan, AQSh, Buyuk Britaniya, Shveytsariya va boshqa davlatlar bilan — muvaffaqiyatli yakunladi.
