Saudiya va Pokiston mudofaa paktini imzoladi
Hujjat har qanday tajovuzga qarshi qo‘shma to‘siq yaratishni ko‘zda tutadi.
Kecha, 17 sentyabr kuni Ar-Riyodda Saudiya Arabistoni valiahd shahzodasi Muhammad bin Salmon va Pokiston bosh vaziri Shahboz Sharif o‘zaro mudofaa paktini imzoladi. Bu haqida Reuters agentligi xabar bermoqda.
Bu kelishuv Isroilning Qatardagi Hamas siyosiy yetakchilariga hujumidan so‘ng chaqirilgan Arab Ligasi va Islom hamkorlik tashkilotining favqulodda yig‘ilishidan ikki kun o‘tib imzolangan.
Qo‘shma bayonotda taʼkidlanishicha, mazkur pakt ikki davlatning xavfsizlikni kuchaytirish, mintaqada va butun dunyoda tinchlikka erishish yo‘lidagi umumiy intilishlarini ifoda etadi. Hujjat mudofaa sohasidagi hamkorlikni rivojlantirish, har qanday tajovuzga qarshi qo‘shma to‘siq yaratishni ko‘zda tutadi. Shuningdek, qayd etilishicha, ikki davlatdan qaysi biriga tajovuz qilinsa, bu har ikkalasiga ham qilingan tajovuz sifatida baholanadi.
Bayonotga ko‘ra, mudofaa pakti Saudiya va Pokiston o‘rtasidagi tarixiy sheriklik, umumiy strategik manfaatlar hamda yaqin mudofaa hamkorligiga asoslanadi.
Ushbu kelishuv arab ko‘rfazi davlatlari AQSHning uzoq yillik xavfsizlik kafolatchisi sifatidagi rolini qayta baholab, unga shubha bilan qarayotgan bir sharoitda yuzaga keldi. Reuters‘ning qayd etishicha, Isroilning o‘tgan haftadagi Qatarga hujumi bu xavotirlarni yana-da kuchaytirgan.
