Ukrainada o‘zbekistonliklarni majburiy mehnatga jalb qilgan guruh qo‘lga olindi
Jinoiy guruh tarkibida Xitoy, O‘zbekiston va Ukraina fuqarolari borligi aytilmoqda.
Kiyev viloyat prokuraturasi tomonidan o‘tkazilgan tezkor tadbirlar davomida 13 nafar O‘zbekiston fuqarosini majburiy mehnatga jalb qilgan jinoiy guruh faoliyati to‘xtatildi.
Tergov materiallariga ko‘ra, gumonlanuvchilar — Xitoy Xalq Respublikasining ikki fuqarosi, O‘zbekiston fuqarosi va bir ukrainalik ayol — og‘ir ijtimoiy ahvolda bo‘lgan shaxslarni ish va turar joy va’dasi bilan chorlash orqali ularni aldab, issiqxonada ekspluatatsiya qilgan.
Qurbonlarning erkinligi keskin cheklangan: ularga hududni tark etish taqiqlangan, qoidalarga bo‘ysunmaganlik uchun jarima qo‘llangan, hatto shaxsiy ehtiyojlarni qondirish ham qat’iy vaqt chegarasiga bog‘langan.
17-sentabr kuni huquqni muhofaza qiluvchi organlar tomonidan gumonlanuvchilarning yashash va ishlab turgan manzillarida tintuv o‘tkazilib, o‘zbekistonlik fuqarolar saqlangan bino aniqlangan. Operatsiya davomida pul mablag‘lari, hujjatlar va transport vositalari musodara qilingan.
Qo‘lga olingan shaxslar ustidan og‘ir toifadagi jinoyat ishi qo‘zg‘atildi. Tergov organlari ular uchun qamoqqa olish chorasi belgilash ustida ish olib bormoqda.
O‘zbekistonlik fuqarolarning vatanga qaytarilishi masalasi bo‘yicha hozircha aniq ma’lumot berilmagan. Mazkur voqea yuzasidan diplomatik vakolatxonalar hamda rasmiy idoralar izoh berishi kutilmoqda.
