Turkiya va O‘zbekiston tomonidan o‘tkazilgan tezkor tadbirda “Sonya” qo'lga olindi
Bosh konsulxona ushbu fuqarodan jabr ko‘rganlardan murojaat qilishlarini soʻramoqda
Oʻzbekiston Respublikasi Ichki ishlar vazirligi hamda Turkiya Respublikasi Ichki ishlar vazirligi hamkorligida oʻtkazilgan tezkor tadbirlar natijasida, odam savdosi jinoyatini sodir etganlikda ayblanib qidiruvda boʻlgan Raxmatova Sanobar (1974-yilda tugʻilgan, “Sonya” laqabi bilan tanilgan) mamlakatimizga deportatsiya qilindi.
Aniqlanishicha, u 2013–2015-yillarda Tailandning Bangkok shahrida fohishaxona tashkil etib, vatandosh ayollarni yuqori daromadli ish va’dasi bilan aldab, Qozogʻiston orqali Tailandga olib borgan hamda fohishalik qilishga majburlagan jinoiy guruh tarkibida faol ishtirok etgan.
Mazkur shaxsning noqonuniy faoliyatidan jabrlangan fuqarolar Oʻzbekiston Respublikasi Ichki ishlar vazirligiga yoki uning hududiy bo‘linmalariga, shuningdek, Istanbul shahridagi Bosh konsulxonaga murojaat etishlari mumkin.
Shuningdek, so‘nggi paytlarda firibgarlik holatlariga oid murojaatlar koʻpaygani bois, fuqarolarga hushyor bo‘lish, begona shaxslardan keladigan shubhali takliflarga ishonmaslik va firibgarlarga aldanib qolmaslik tavsiya etiladi.
