2025/2026-o‘quv yili uchun to‘lov-kontrakt miqdorlari tasdiqlandi
1-kurs talabalari belgilangan to‘lovning kamida 25 foizini 30-oktyabrgacha to‘lashi kerak.
Oliy ta’lim, fan va innovatsiyalar vazirligi matbuot xizmati 2025/2026-o‘quv yili uchun davlat oliy ta’lim muassasalarida to‘lov-kontrakt miqdorlari tasdiqlanganini ma’lum qildi. Bu bo‘yicha Davlat qabul komissiyasi majlisida tegishli bayon qabul qilingan.
Yangi tartibga ko‘ra, bakalavriat ta’lim yo‘nalishlari va magistratura mutaxassisliklari bo‘yicha bir nafar talabani bir yil o‘qitish uchun bazaviy to‘lov-kontrakt qiymati belgilandi. Stipendiyali kontrakt miqdori esa amaldagi stipendiya summasini 12 oyga ko‘paytirgan holda hisoblanadi. Agar o‘quv yili davomida stipendiya miqdori oshirilsa, talabaning umumiy to‘lovi ham qayta hisoblanadi.
Moliyaviy mustaqillikka ega oliy ta’lim muassasalari qabul qilingan talabalar uchun kontrakt miqdorini mustaqil belgilash huquqiga ega. Talabalikka tavsiya etilgan abituriyentlar uchun belgilangan to‘lovning kamida 25 foizini 2025-yil 30-oktyabrgacha to‘lash muddati uzaytirildi.
Shuningdek, iqtisodiyot tarmoqlarida kamida 5 yil ish stajiga ega bo‘lgan va tavsiyanoma asosida o‘qishga qabul qilinganlar uchun kontrakt miqdori bazaviy to‘lov-kontrakt qiymatidan ikki barobar qilib belgilandi. Joriy yilda tabaqalashtirilgan kontrakt miqdori oliy ta’lim muassasalari rahbarlari tomonidan mustaqil belgilanadi.
