Farg‘onada fuqarolarni aldab 1,2 mlrd so‘m kredit olgan shaxs qo‘lga olindi
Firibgar avtokredit bahonasida 6 fuqaroni chuv tushirgan.
Bosh prokuratura departamenti xabariga ko‘ra, Qo‘qon shahrida fuqarolarning ishonchini suiiste’mol qilish orqali katta miqdorda mablag‘ qo‘lga kiritgan shaxsga nisbatan jinoyat ishi qo‘zg‘atildi.
Tekshiruv davomida u 6 nafar fuqaroni aldab, avtomashina sotib olish uchun ularni kredit rasmiylashtirishga ko‘ndirganligi aniqlangan. Natijada jami 1,2 milliard so‘m kredit mablag‘i olingan. Mazkur pullar hisobidan 8 ta avtomobil xarid qilingan va keyinchalik uchinchi shaxslarga sotilgan. Olingan daromad esa shaxsiy ehtiyojlarga sarflangan.
Holat yuzasidan unga nisbatan O‘zbekiston Respublikasi Jinoyat kodeksining tegishli moddalari bo‘yicha jinoyat ishi qo‘zg‘atildi. Qonunchilikka ko‘ra, ushbu qilmish uchun 10 yilgacha ozodlikdan mahrum qilish jazosi nazarda tutilgan. Shu bilan birga, yetkazilgan zarar qoplanganda jazo yengillashtirilishi mumkinligi qayd etildi.
Hozirda tergov harakatlari olib borilmoqda.
