“Isroil tomonidan Suriyaga tahdidlar davom etmoqda”

Suriyaning muvaqqat prezidenti Ahmad ash-Sharaa BMT Bosh Assambleyasi minbaridan nutq so‘zlab, Isroil mamlakatni yangi mojarolarga tortishga urinayotganini maʼlum qildi.

 

“Suriya 60 yildan beri bosim ostida. Xalq yillar davomida azob-uqubat va yetishmovchiliklarga duch keldi. O‘z huquqini talab qilganlarda esa o‘lim xavfi bo‘ldi. Isroil bugungi o‘tish davridan foydalanib, mamlakatimizni yana mojaroga tortishi mumkin. Buning oqibatini hech kim oldindan ayta olmaydi”, — dedi u.

 

Ash-Sharaa Suriya muammosini muloqot va diplomatiya orqali hal qilish zarurligini taʼkidlab, xalqaro hamjamiyatni Damashqni qo‘llab-quvvatlashga chaqirdi. U milliy dialog boshlanganini, texnokratlar hukumatini tuzganini va qurollar davlat nazoratida bo‘lishiga asoslangan fuqarolik hamda harbiy institutlar qayta tashkil etilganini qayd etdi.

 

Shuningdek, Ash-Sharaa Asad rejimi davrida joriy etilgan sanksiyalarni bekor qilishni talab qildi.