“Falastin davlatini tan olish terrorizmni osonlashtiradi” - Netanyaxu
Isroil Bosh vazirining BMT Bosh Assambleyasida so‘zlagan nutqi G‘azoda ovoz kuchaytirgichlar hamda falastinliklarning aloqa vositalari orqali to‘g‘ridan-to‘g‘ri efirga uzatildi.
26-sentabr kuni Isroil Bosh vaziri Benyamin Netanyaxu Nyu-York shahrida bo‘lib o‘tayotgan BMT Bosh Assambleyasi yalpi majlisida nutq so‘zladi.
O‘z chiqishida u “XAMAS”ni zudlik bilan qurolsizlantirish va garovga olinganlarni ozod qilishga chaqirdi. Bosh vazirning ta’kidlashicha, “agar garovdagilar ozod qilinsa va XAMAS qurolni topshirsa, mojaro darhol yakunlanadi”. Shu munosabat bilan u G‘azo sektori xavfsizligi ustidan Isroil nazorati saqlanishi zarurligini qayd etdi.
Netanyaxu, shuningdek, Falastin davlatini tan olish masalasiga to‘xtalar ekan, uni qat’iyan rad etishini yana bir bor bildirdi. Unga ko‘ra, “Isroil fuqarolarining xavfsizligiga tahdid soluvchi guruhlar boshqaruvidagi davlat tuzilmasi qabul qilinishi mumkin emas”. Bosh vazir Falastin ma’muriyatidagi korrupsiya holatlarini ham tanqid qildi.
Isroil rahbari Falastin davlatini tan olgan mamlakatlarni keskin qoralab, ularni “XAMASga taslim bo‘lishda” aybladi va “bunday qarorlar terrorizmni osonlashtiradi” deya ta’kidladi. Shu bilan birga, Netanyaxu AQSh prezidenti Donald Trampga Isroilni qo‘llab-quvvatlagani uchun minnatdorchilik izhor etdi.
Nutqdan avval Isroil delegatsiyasi 2023-yil 7-oktabr kuni XAMAS tomonidan amalga oshirilgan hujum haqidagi videolavhani namoyish qildi. Unda terrorchilarning tana kameralari orqali yozib olingan kadrlar ham aks ettirildi. Netanyaxu minbardan QR-kod namoyish etib, xohlovchilar ushbu lavhani to‘liq ko‘rishlari mumkinligini ma’lum qildi.
Nutq davomida Isroil armiyasi G‘azo chegarasida va shahar ichida ovoz kuchaytirgichlar o‘rnatib, shuningdek, aholi va jangarilarning telefonlariga to‘g‘ridan-to‘g‘ri uzatish orqali Bosh vazir murojaatini efirga uzatdi. Netanyaxu garovga olinganlarga ibroniy va ingliz tillarida murojaat qilib:
“Biz sizni bir lahza ham unutmadik. Sizlarni uylaringizga qaytarmagunimizcha jim turmaymiz”, — deya ta’kidladi.
Uning chiqishi paytida Bosh Assambleya zalini birinchi bo‘lib arab va musulmon davlatlari delegatsiyalari tark etdi.
