Forbes: Tramp oilasining boyligi 7,3 milliard dollarga yetdi

Forbes jurnalining ma’lumotlariga ko‘ra, AQSh prezidenti Donald Tramp va uning turmush o‘rtog‘i Melania Trampning umumiy boyligi 2024-yil noyabridan buyon 3 milliard dollarga ortib, 7,3 milliard dollarga yetgan. Natijada, Donald Tramp dunyoning eng boy kishilari reytingida 118 pog‘ona yuqorilab, 201-o‘rinni egalladi.

 

Nashr hisob-kitoblariga ko‘ra, boylikning asosiy qismi — qariyb 2 milliard dollar Trampning kriptovalyuta sohasidagi investitsiyalari bilan bog‘liq. Shuningdek, Nyu-York apellyatsiya sudi tomonidan firibgarlik ishi doirasida unga nisbatan belgilangan jarimaning bekor qilinishi davlat rahbariga 500 million dollarni tejash imkonini bergan.

 

Forbes qayd etishicha, Tramp o‘z brendini poyabzal, soat va atir kabi mahsulotlarda litsenziyalash orqali qo‘shimcha 400 million dollar daromad olgan. Melania Tramp esa kitoblari, chiqishlari va shaxsiy kriptovalyuta (memcoin) loyihasi orqali oilaviy mablag‘ni yana 200 million dollarga oshirgan.

 

Shuningdek, Tramp oilasining boshqa a’zolari ham sezilarli daromad o‘sishiga erishgan. Donald Jr. va Eric Trampning shaxsiy boyliklari keskin oshgan bo‘lib, ular American Bitcoin va World Liberty Financial kompaniyalarida ulushlarga ega. Ivanka Trampning turmush o‘rtog‘i Jared Kushner esa Affinity Partners investitsiya kompaniyasi orqali 4,6 milliard dollardan ortiq mablag‘ jalb qilib, milliarderlarga qatoriga qo‘shilgan. U, shuningdek, Trampning ko‘chmas mulk biznesida 560 million dollarlik ulushga egalik qiladi.