Isroil armiyasi G‘azoning katta qismini nazoratga oldi - OAV
Shaharning taxminan 800 ming aholisi evakuatsiya qilingan.
Isroil mudofaa kuchlari (IDF) G‘azo shahrining sezilarli qismini o‘z nazorati ostiga olgani haqida The Jerusalem Post nashri xabar berdi.
Manbaga ko‘ra, so‘nggi kunlarda IDF har kecha 140 dan ortiq nishonga zarba bergan, natijada shaharning taxminan 800 ming aholisi evakuatsiya qilingan.
Rasmiy ma’lumotlarda qayd etilishicha, An-Nadi, Shayx Ajlin, Zaytun, Shujayya va Tuffa hududlari Isroil armiyasi tomonidan egallangan.
Shu bilan birga, Isroil qo‘shinlari hali G‘azo shahrining markaziy qismi — Al-Rimal mahallasi ustidan nazorat o‘rnatmagan. Bu hududda banklar, davlat muassasalari, universitetlar, media markazlari va XAMASning yuqori martabali amaldorlari joylashgani aytilmoqda.
Shuningdek, Eski shahar hamon XAMAS nazorati ostida bo‘lib, guruh a’zolari tarixiy binolardan foydalanayotgani qayd etilmoqda. IDF rejalari orasida Ash-Shati qochqinlar lageri ustidan nazoratni qo‘lga olish ham borligi ta’kidlanadi.
