Toshkentda Cobalt haydovchisi piyodani urib yubordi
Jabrlanuvchiga birlamchi tibbiy yordam ko‘rsatilib, qo‘shimcha tekshiruvlar o‘tkazilmoqda.
Toshkent shahrining Yunusobod tumanida yo‘l-transport hodisasi yuz berdi. Toshkent shahar IIBB Yo‘l harakati xavfsizligi boshqarmasi ma’lumotiga ko‘ra, voqea 27-sentabr kuni soat 18:30 da Amir Temur ko‘chasida sodir bo‘lgan.
Dastlabki ma’lumotlarga ko‘ra, 1988-yilda tug‘ilgan haydovchi F.R. boshqaruvidagi Cobalt rusumli avtomobil tartibga solinmagan piyodalar o‘tish joyidan o‘tayotgan fuqaroni urib yuborgan. Hodisadan so‘ng jabrlanuvchiga zudlik bilan shifokorlar tomonidan birlamchi tibbiy yordam ko‘rsatilgan. Hozirda uning sog‘lig‘i bo‘yicha qo‘shimcha tibbiy tekshiruvlar o‘tkazilmoqda.
Hodisa yuzasidan huquqni muhofaza qiluvchi organlar tomonidan tergovga qadar tekshiruv ishlari boshlangan. YTH sabablari va haydovchining harakatlariga huquqiy baho sudga oid ekspertiza natijalari asosida beriladi.
Eslatib o‘tamiz, bundan avvalroq Surxondaryo viloyati Shurchi tumanida Damas rusumli avtomobil piyodalar yo‘lagidan o‘tayotgan to‘rt nafar fuqaroga urib ketgani xabar qilingandi.
