O‘zbekiston bozorlarida 130 tonnadan ortiq xavfli oziq-ovqat mahsulotlari savdodan chiqarildi
500 dan ziyod sotuvchi sanitariya qoidalarini buzganlik uchun jarimaga tortildi.
O‘zbekistondagi bozorlar va savdo nuqtalarida o‘tkazilgan tekshiruvlar davomida 130 tonnadan ortiq sog‘liq uchun xavfli oziq-ovqat mahsulotlari savdodan chiqarildi.
Sanitariya-epidemiologiya osoyishtaligi va aholi salomatligi qo‘mitasi ma’lumotiga ko‘ra, mamlakat bo‘ylab 300 ga yaqin dehqon bozorida o‘tkazilgan reydlarda sifatsiz yoki sanitariya talablariga javob bermaydigan mahsulotlar aniqlangan. Go‘sht, sut, non, salat va qandolat mahsulotlarini belgilangan tartibni buzgan holda sotgan 500 dan ortiq shaxs jarimaga tortildi.
Qo‘mita vakillarining ta’kidlashicha, muntazam tekshiruvlar aholiga xavfsiz oziq-ovqat yetkazib berishni ta’minlash va ovqatdan zaharlanish holatlarining oldini olishga qaratilgan.
Reydlar jarayonida bozorlarning sanitariya infratuzilmasida mavjud tizimli muammolar ham qayd etildi. Xususan, ko‘plab savdo majmualarida go‘sht va sut mahsulotlarini sotish uchun mo‘ljallangan maxsus pavilyonlar, veterinariya va sanitariya laboratoriyalari, jamoat hojatxonalari va chiqindi to‘plash joylari mavjud emasligi aniqlandi. Ba’zi bozorlarda esa suv ta’minoti va oqava suv tizimi umuman yo‘q.
Shuningdek, sanitariya profilaktikasi bo‘yicha dezinfeksiya, dezinseksiya va deratizatsiya xizmatlari bilan shartnomalar tuzilmagan bo‘lishi ham keng tarqalgan muammo sifatida qayd etildi.
