Pokistonda terakt sodir bo‘ldi
Oqibatda kamida 10 kishi halok bo‘lgan.
Bugun, 30 sentyabr kuni Pokistonning Kvetta shahridagi chegara qo‘shinlari boshqarmasi oldida potrlash yuz berib, kamida o‘n kishi halok bo‘ldi, 32 kishi turli darajada tan jarohati oldi.
Rasmiy maʼlumotlarga ko‘ra, portlashdan so‘ng qurollangan guruh qo‘shin postiga hujum qilishga uringan, natijada xavfsizlik kuchlari bilan to‘qnashuv yuz bergan. Jang paytida bir necha hujumchi vafot etgani xabar qilinmoqda. Jabrlanganlar orasida ham fuqarolar, ham harbiy xizmatchilar bor.
Hozircha hujum uchun masʼuliyatni hech bir tashkilot o‘z zimmasiga olmagan. Shu bilan birga, Balujiston mintaqasidagi ajraluvchi guruhlar faoliyati tufayli hodisaga kimlar aloqador bo‘lishi mumkinligi haqida turli taxminlar aytilmoqda.
Pokiston prezidenti va bosh vaziri voqeani keskin qoralab, aybdorlarga nisbatan qatʼiy choralar ko‘rilishini bildirdi. Hukumat qurbonlar oilasiga taʼziya yo‘lladi, jabrlanganlar esa shifoxonalarga joylashtirildi.
Maʼlumot uchun, Balujiston strategik ahamiyatga ega hudud bo‘lib, u yerda Xitoy–Pokiston iqtisodiy yo‘lagi kabi yirik loyihalar amalga oshirilmoqda. Kvettadagi ushbu portlash mintaqaning xavfsizligi va barqarorligiga jiddiy tahdid sifatida baholanmoqda.
