Samarqandda piyodani urib yuborgan haydovchi qamaldi
Sud unga nisbatan hukm eʼlon qilib, maxsus huquqdan mahrum qildi.
Joriy yilning 11 aprel kuni Samarqand shahrida 28 yoshli haydovchi Lacetti avtomashinasini piyodalar yo‘lagi tomon haydab, yo‘l-transport hodisasiga sababchi bo‘lgandi. Oqibatda bir kishi halok bo‘lib, yana bir nechta shaxs turli darajadagi tan jarohatlarini olgandi.
Jinoyat ishlari bo‘yicha Samarqand shahar sudi mazkur ishni ko‘rib chiqib, haydovchini Jinoyat kodeksining 266-moddasi 2-qismi bilan aybdor deb topdi. Sud hukmiga ko‘ra, 1997 yilda tug‘ilgan haydovchi 7 yilga ozodlikdan mahrum etildi hamda 3 yil muddatga transport vositasini boshqarish huquqidan mahrum qilindi.
Eslatib o‘tamiz, yaqinda Surxondaryo viloyatida ham shunga o‘xshash holat kuzatilgan edi. Unda Damas haydovchisi piyodalar yo‘lagidan o‘tayotgan to‘rt kishini urib ketgani natijasida ular turli tan jarohatlari olgan.
