Shavkat Mirziyoyev o‘qituvchi va murabbiylarni kasb bayrami bilan tabrikladi
O‘qituvchilarga ipoteka bo‘yicha yengilliklar, imtiyozli kreditlar va boshqa ijtimoiy imkoniyatlar yaratilishi ma’lum qilindi.
O‘zbekiston Respublikasi Prezidenti Shavkat Mirziyoyev mamlakatimizdagi barcha ustoz va murabbiylarni 1-oktabr – O‘qituvchi va murabbiylar kuni bilan tabrikladi.
Davlat rahbari o‘z tabrigida yosh avlod tarbiyasi va ta’limini yuksak darajada tashkil etishda o‘qituvchilarning xizmatlarini alohida e’tirof etib, ularning mehnatini jamiyat taraqqiyoti va kelajak poydevori sifatida baholadi.
Tabrikda so‘nggi yillarda ta’lim va ilm-fan sohasida amalga oshirilgan keng ko‘lamli islohotlar, yangi maktablar, bog‘chalar, oliy ta’lim muassasalari barpo etilgani, pedagoglarning mehnatini munosib qadrlash choralari ko‘rilayotgani ta’kidlandi.
Shuningdek, ta’lim tizimida boshlangan yangi dasturlar, jumladan, “Yangi avlod” bog‘chalari, 12 yillik maktab ta’limi, yagona davlat imtihonlari, kasbiy ta’limda xalqaro standartlarning joriy etilishi haqida so‘z bordi.
Prezident, shuningdek, pedagoglarning ijtimoiy qo‘llab-quvvatlanishi masalasiga alohida to‘xtalib, ularning ipoteka shartlarida yengilliklar, o‘qituvchi farzandlari uchun kontrakt to‘lovida chegirmalar, imtiyozli kreditlar va boshqa qo‘llab-quvvatlov choralari joriy etilishini ma’lum qildi.
Davlat rahbari ustoz va murabbiylarga mustahkam sog‘liq, oilaviy farovonlik va kelgusi faoliyatlarida ulkan muvaffaqiyatlar tiladi.
