Qirg‘izistonda o‘lim jazosi qayta tiklanishi mumkin
Sadir Japarov og‘ir jinoyatlar uchun qonunchilikka o‘zgartirish kiritish bo‘yicha topshiriq berdi.
Qirg‘iziston prezidenti Sadir Japarov mamlakatda ayollar va bolalarga qarshi sodir etilgan o‘ta og‘ir jinoyatlar uchun o‘lim jazosini joriy etishga doir qonun loyihasi ishlab chiqilishini topshirdi. Bu haqda Prezident matbuot kotibi Askat Alagozov o‘zining ijtimoiy tarmoqdagi sahifasida ma’lum qildi.
Unga ko‘ra, Prezident Administratsiyasi Huquqiy ta’minlash bo‘limi mudiriga bolalarni zo‘rlash, ayollarni zo‘rlash va o‘ldirish jinoyatlari uchun eng og‘ir jazoni nazarda tutuvchi qonunchilikka o‘zgartirishlar kiritish bo‘yicha topshiriq berilgan.
Mazkur qaror Issiqko‘l viloyatida 17 yoshli qizning o‘ldirilishi ortidan qabul qilingan. Aniqlanishicha, jinoyatni ilgari sudlangan erkak sodir etgan bo‘lib, u hozirda qo‘lga olingan.
Ma’lumot uchun, Qirg‘izistonda o‘lim jazosiga moratoriy 1998-yildan buyon amal qilib kelmoqda. 2007-yilda ushbu jazo rasman bekor qilingan va 2010-yilda mamlakat BMTning o‘lim jazosini bekor qilishga qaratilgan Ikkinchi Fakultativ Protokoliga qo‘shilgan.
