Toshkentda fuqaro IIO xodimiga 10 ming dollar pora berdi
Jinoyat qidiruv xodimi porani rad etgan, fuqaro ustidan jinoyat ishi qo‘zg‘atildi.
Toshkent shahrida jinoyat qidiruv vakiliga katta miqdorda pora taklif qilgan fuqaro qo‘lga olindi. Bu haqda poytaxt Ichki ishlar bosh boshqarmasi ma’lum qildi.
Ma’lum qilinishicha, Shayxontohur tumani IIB xodimlari tomonidan o‘tkazilgan tezkor tadbir chog‘ida giyohvandlik vositalarini noqonuniy saqlab kelayotgan shaxs aniqlangan. Gumonlanuvchi holat yuzasidan choralar ko‘rilmasligini so‘rab, jinoyat qidiruv xodimiga 10 ming AQSh dollari miqdorida pora taklif qilgan.
Huquqni muhofaza qiluvchi xodim qonunga xilof harakatlarga rozilik bildirmagan va darhol rahbariyatga xabar qilgan. Shundan so‘ng, IIV hamda prokuratura vakillari ishtirokida o‘tkazilgan maxsus tadbirda fuqaro porani bergan vaqtida ushlangan.
Mazkur holat yuzasidan Jinoyat kodeksining 211-moddasi (“Pora berish”) bilan jinoyat ishi qo‘zg‘atilib, tergov harakatlari olib borilmoqda.
Shuningdek, IIBB ma’lumotiga ko‘ra, joriy yil boshidan buyon mamlakatda 117 nafar fuqaro IIO xodimlariga pora taklif qilgan vaqtida ushlangan. Toshkent shahrida esa “Dolzarb 20 kunlik” tezkor-profilaktik tadbirlari davomida 270 ta jinoyat fosh etilib, 4,5 kilogrammdan ortiq giyohvandlik moddalarining noqonuniy muomalasiga chek qo‘yilgan.
