Italiyada Falastinni qo'llab-quvvatlash uchun umumiy ish tashlash boshlandi

Italiyada Falastinni qo‘llab-quvvatlash maqsadida umumiy ish tashlash boshlandi. ANSA axborot agentligining xabariga ko‘ra, mamlakat bo‘ylab poyezdlar va shaharlararo qatnovlarda bekor qilinish va kechikishlar kuzatilmoqda. Ish tashlash Italiya umumiy mehnat konfederatsiyasi tashabbusi bilan tashkil etilib, Sumud flotiliyasi missiyasini qo‘llab-quvvatlashga qaratilgan. Missiya ishtirokchilari Isroil hukumati tomonidan G‘azo sektori dengiz blokadasini buzishga uringanlikda ayblanib hibsga olingandi.

 

Norozilikka port ishchilari ham qo‘shilib, xususan Livorno portiga kirish yo‘llari to‘sib qo‘yilgan, yuk mashinalarining uzun navbatlari yuzaga kelgan. Rim, Milan, Neapol va Turin shaharlarida Falastin bayroqlari ostida mitinglar davom etmoqda. Shu bilan birga, Boloniya va Turinda namoyishchilar bilan politsiya o‘rtasida to‘qnashuvlar sodir bo‘ldi, vandalizm holatlari qayd etildi. Turinda esa norozilar Yevropa texnologiyalar haftaligi o‘tkaziladigan maydonga bostirib kirib, jihozlarga zarar yetkazgan.

 

Hukumat ish tashlashni noqonuniy deb e’lon qilgan va qatnashchilarga nisbatan jazo choralarini ko‘rib chiqmoqda. Italiya bosh vaziri Jorjiya Meloni ish tashlashni “dam olish kunlarini uzaytirish istagi” sifatida baholadi. Muxolifat esa hukumatni “falastinliklarga qarshi jinoyatchi rejim”ni qo‘llab-quvvatlayotganlikda aybladi.

 

Isroil tomonidan hibsga olingan italiyalik faollar orasida 40 nafar fuqaro borligi ma’lum qilindi. Italiya Tashqi ishlar vazirligi ular deportatsiya qilinishidan avval yaxshi sharoitda saqlanayotganini bildirdi. Shuningdek, hibsga olinganlar orasidagi to‘rt nafar parlament a’zosi, jumladan, Yevropa parlamenti deputatlari ozod etilib Rimga qaytgan.

 

Huquq-tartibot kuchlari mamlakat bo‘ylab yuzaga kelishi mumkin bo‘lgan tartibsizliklarning oldini olish uchun shay holatga keltirilgan.