O‘rmon xo‘jaliklariga 1,3 mln dollarlik yangi texnikalar tarqatildi
Ular 16 xil vazifani bajarish imkoniyatiga ega.
“O‘zbekistonda barqaror o‘rmon landshaftlarini tiklash” loyihasini amalga oshirish chora-tadbirlari to‘g‘risida”gi Prezident qaroriga muvofiq, mamlakatimizda yangi o‘rmonlarni barpo etish va mavjudlarini qayta tiklash ishlarini samarali tashkil etish maqsadida Jahon banki mablag‘lari hisobidan Belarusda ishlab chiqarilgan 39 ta qishloq xo‘jaligi texnikasi olib kelindi.
Bugun Toshkent shahrida Ekologiya vazirligi huzuridagi O‘rmon agentligi tomonidan ushbu texnikalarni hududiy davlat o‘rmon xo‘jaliklariga topshirish marosimi o‘tkazildi. Tadbirda O‘rmon agentligi direktori Erkin Muhiddinov, agentlik vakillari, hududiy mutaxassislar va ommaviy axborot vositalari ishtirok etdi.
Kirish so‘zida Agentlik direktori Erkin Muhiddinov o‘rmonlarning ekologik barqarorlikni taʼminlashdagi o‘rniga to‘xtalib, sohada amalga oshirilayotgan islohotlar xodimlardan yana-da katta masʼuliyat talab etishini taʼkidladi.
Shuningdek, taqdim etilgan texnikalar o‘rmon va adir sharoitlariga moslashgan bo‘lib, ular 16 xil vazifani bajarish imkoniyatiga ega. Endilikda mazkur maxsus texnikalar yordamida respublika hududlarida yashillik darajasi oshiriladi, o‘rmon maydonlari kengaytiriladi va “Yashil makon” umummilliy loyihasi izchil davom ettiriladi. Bu esa ekologik barqarorlikni taʼminlash imkoniyatlarini yana-da kengaytiradi.
