Toshkentda Afg‘oniston parlamentining sobiq deputati qo‘lga olindi
Abbos Ibrohimzoda 350 ming dollar garov puli qo‘yganiga qaramay hibsda qolmoqda.
Afg‘oniston parlamentining sobiq spikeri o‘rinbosari va yirik tadbirkor Abbos Ibrohimzoda Toshkentda qo‘lga olindi. Bu haqda Amu nashri xabar berdi.
Balx viloyatidan saylangan sobiq deputat biznesdagi raqiblarining ko‘plab shikoyatlari ortidan hibsga olingani bildirilmoqda. U 350 ming dollardan ortiq garov puli qo‘yganiga qaramay, hanuz hibsda qolmoqda.
Ma’lum qilinishicha, Ibrohimzoda asos solgan Ibrohimzada Group yigirmadan ortiq kompaniyani birlashtirgan, Balxdagi xususiy telekanalni nazorat qilgan, shuningdek, ta’lim va xayriya sohalariga ham sarmoya kiritgan. Guruhning xayriya jamg‘armasi ayollar savodxonligini oshirish bilan shug‘ullangan.
O‘zbekiston rasmiylari hozircha mazkur qo‘lga olish yuzasidan izoh bermagan.
Eslatib o‘tamiz, O‘zbekiston va Afg‘oniston o‘tgan yili tadbirkorlarga ko‘maklashish maqsadida qo‘shma vakolatxona ochgan bo‘lib, bu transport, logistika, savdo va sanoat sohalarida hamkorlikni kengaytirishga xizmat qilishi kutilmoqda.
