O‘zbekiston ilk bor “The Amazing Race Australia” shousida namoyish etildi
8-sentabr kuni efirga uzatilgan “The Amazing Race Australia”ning yangi mavsumining muhim qismlaridan biri ilk bor O‘zbekistonda, xususan Samarqand shahrida suratga olingan.
Joriy yilning sentabr oyida Avstraliyaning Network 10 telekanali hamda 10 Play striming platformasida mashhur sayyohlik shousi — “The Amazing Race Australia”ning yangi mavsumi efirga uzatildi. Premyera 8-sentyabr kuni bo‘lib o‘tdi. Mavsumning muhim qismlaridan biri ilk bor O‘zbekistonda, xususan Samarqand shahrida suratga olingan.
Loyihaning O‘zbekistonda o‘tkazilgan epizodlari mahalliy madaniyat, hunarmandchilik va an’anaviy hayot tarzini o‘zida aks ettirdi. Ishtirokchilar “Andijon polkasi”ni ijro etish, karnay chalish, gilam yuvish, quruq mevalarni saralash, anor sharbati tayyorlash, shuningdek, Urgut tumanidagi “Tersak” turizm qishlog‘ida kartoshka ekish kabi topshiriqlarni bajarishdi. Bu O‘zbekistonning ushbu xalqaro shou tarixidagi ilk ishtiroki bo‘ldi.
Premyera haftasida loyiha Avstraliya va butun dunyo bo‘ylab 1,2 milliondan ortiq tomoshabinni jalb qildi. “The Amazing Race” brendi 15 marotaba Primetime Emmy mukofotiga sazovor bo‘lgan bo‘lib, 2025-yilda ham “Eng yaxshi realiti-musobaqa dasturi” nominatsiyasida qayd etildi.
O‘zbekistonda suratga olingan epizodlarda “Below Deck” yulduzi Aisha Skott, uning kallig‘i Skott Dobson, regbi afsonasi Brendan Fevola qizi Leni bilan, shuningdek, Red Bullning friraneri Dom Di Tommasso va bloger Marks Marsters, qo‘shiqchi Rob Mills, oshpazlik tanqidchisi Melissa Leong kabi mashhur ishtirokchilar qatnashdi.
Ishtirokchilar O‘zbekistondagi suratga olish jarayonini iliq taassurotlar bilan eslashdi. Komediya aktrisasi Steph Tisdell mamlakatni “noyob tajriba” deb atab, “O‘zbekiston — aql bovar qilmaydigan go‘zallik va mehmondo‘stlik yurti” ekanini ta’kidladi. Boshqa qatnashchilar ham Samarqanddagi qulay sharoitlar va aholining samimiyligini yuqori baholadi.
Suratga olish ishlari 2025-yil 18–25-mart kunlari O‘zbekiston Turizm qo‘mitasi, Tashqi ishlar vazirligi hamda Samarqand viloyati hokimligi ko‘magida o‘tkazilgan. Loyiha tashkiliy jihatdan AQShning Next Field International telekompaniyasi tomonidan amalga oshirildi.
“Shou muvaffaqiyatli o‘tdi. O‘zbekistonning ishtiroki mamlakatni xalqaro miqyosda targ‘ib qilish uchun yangi imkoniyatlar ochdi. Ko‘plab xorijiy prodyuserlar endilikda O‘zbekistonda suratga olishga qiziqish bildirmoqda”, — dedi Next Field International bosh direktori Stanislav Solovkin.
Mavsumda, shuningdek, Shri-Lanka, Tayvan va Indoneziya davlatlarida ham suratga olingan epizodlar mavjud.
