O‘FA 340 ming dollar jarimaga tortildi
Bu O‘zbekiston – Qatar uchrashuvida qoidalar buzilgani bilan bog‘liq.
Osiyo futbol konfederatsiyasi (OFK) O‘zbekiston futbol assotsiatsiyasini 340 ming dollar miqdorida jarimaga tortdi. Bu haqda tashkilotning rasmiy saytida xabar berildi.
Maʼlumotga ko‘ra, jarima 2026 yilgi jahon chempionati saralash bosqichida 10 iyun kuni Toshkentdagi “Bunyodkor” stadionida bo‘lib o‘tgan O‘zbekiston – Qatar uchrashuvida qoidalar buzilgani bilan bog‘liq.
O‘yindan keyin O‘FA OFK ruxsatisiz yopilish marosimini tashkil etgan. Marosim chog‘ida futbolchilarga mukofot sifatida taqdim etilgan BYD avtomobillari maydonga olib chiqilgan. OFK bu holatni marketing huquqlarini buzish va “ambush-marketing” holati sifatida baholagan.
Shuningdek, O‘FA rasmiy tadbirlar — matbuot anjumanlari va intervyular tashkil etishda OFK talablariga to‘liq rioya etmagani uchun ham javobgarlikka tortilib, jarimaga uchradi.
Maʼlumot uchun, mezbon mamlakatlar stadion ichida va atrofida faqat tashkilot homiylarining brendlaridan foydalanishi shart. Bu talabni buzgan jamoalar moliyaviy jazoga tortiladi.
Bundan tashqari, O‘FA “Mirabror Usmonov xotirasi kubogi-2025” xalqaro turnirini (22–28 iyul) tashkil etishda ham qoidabuzarlikka yo‘l qo‘ygan. Assotsiatsiya musobaqani avtorizatsiya qilish uchun kech so‘rov yuborgani uchun qo‘shimcha ravishda 1500 dollar jarimaga tortildi.
