Saida Mirziyoyeva Nukusdagi “Salomatlik marafoni” bilan tanishdi
Maʼlumotlarga ko‘ra, marafon doirasida atigi to‘rt kun ichida qariyb 12 ming nafar fuqaro ko‘rikdan o‘tgan.
Prezident administratsiyasi rahbari Saida Mirziyoyeva Qoraqalpog‘istonda bo‘lib, “Salomatlik marafoni” qanday o‘tkazilayotgani bilan tanishdi.
Nukus shahridagi 12 ta oilaviy poliklinika va 3 ta jamoat maskanida aholi diagnostikadan o‘tkazilmoqda. Shuningdek, bemorlarni yo‘naltirish va raqamlashtirish tizimi joriy etilmoqda.
Shifokorlarning hamkorlikdagi saʼy-harakatlari va AI TOP-3 CDSS, MuxlisaMED AI, AI Mammo singari sunʼiy intellekt yechimlari joriy etilishi natijasida yana-da tezkor va aniq tibbiy yordam ko‘rsatish imkoni yaratilmoqda.
Atigi to‘rt kun ichida qariyb 12 ming nafar fuqaro ko‘rikdan o‘tdi, shulardan 1 700 dan ortig‘i chuqur tekshiruvlardan o‘tkazildi, 116 nafari esa davolanishga yo‘naltirildi.
“Shuningdek, Qoraqalpog‘iston tibbiyot instituti bolalar jarrohligi bo‘limida murakkab operatsiyalarni boshdan kechirgan kichik bemorlar bilan uchrashib, suhbatlashdik. Ularning matonati va samimiy tabassumlari beixtiyor har birimizni taʼsirlantirdi.
Ikkita yangi loyiha ishga tushirildi — raqamli oilaviy pasportni joriy etishga asoslangan “Oilaviy salomatlik maktabi” hamda yoshlar ko‘magida aholi tibbiy savodxonligini oshirishni ko‘zda tutuvchi “Salomatlik volontyorlari” shular jumlasidan.
Sog‘liqni saqlashni zamon talablariga mos hamda har bir inson uchun qulay va foydali tizimga aylantirishni maqsad qilgan “Tibbiyot novatorlari” jamoasidagi yosh mutaxassislarga minnatdorlik bildiraman.
Millat salomatligi — bu barchamiz yelkama-yelka bosib o‘tadigan umumiy yo‘limiz va masʼuliyatimizdir”, deb yozdi Mirziyoyeva.
