Toshkentda ATTO kartalardan ortiqcha to‘lovlar yechilyaptimi?
ATTO kompaniyasi metro yo‘lovchilarining kartalaridan ortiqcha yechimlar haqidagi shikoyatlarga izoh berdi.
So‘nggi kunlarda Toshkent shahrida ayrim yo‘lovchilar jamoat transportida foydalaniladigan ATTO kartalaridan uyda bo‘lgan paytida ham to‘lovlar yechib olingani haqida shikoyat bildirdilar. Ushbu holat yuzasidan “ATTO” kompaniyasi rasmiy munosabat bildirdi.
Kompaniya ma’lum qilishicha, texnik nosozlik 16–30 sentabr kunlari “Buyuk Ipak yo‘li” metro bekatida o‘rnatilgan 1-sonli terminalda qayd etilgan. Shuning uchun ushbu davrda amalga oshirilgan ayrim yo‘l haqi to‘lovlari o‘z vaqtida kartalardan yechilmagan.
ATTO’ning bayonotida ta’kidlanishicha, hozirda kechikkan tranzaksiyalar avtomatik tarzda amalga oshirilmoqda. “Hech qanday ortiqcha yoki asossiz yechim bo‘lmaydi — faqat yo‘lovchilar tomonidan amalda bajarilgan haqiqiy sayohatlar uchun to‘lovlar undirilmoqda”, — deyiladi kompaniya izohida.
Kompaniya noqulayliklar uchun foydalanuvchilardan uzr so‘rab, tizimdagi muammo bartaraf etilganini ma’lum qildi.
