Italiyada yangi qonun loyihasi parlamentga taqdim etildi
Unga ko‘ra, jamoat joylarida burqa kiyish taqiqlanadi.
Italiya Bosh vaziri Jorjiya Meloni yetakchiligidagi “Italiya birodarlari” partiyasi “islomiy va madaniy ajralish” deb atalgan holatlarga qarshi kurashish maqsadida yangi qonun loyihasini parlamentga taqdim etdi.
Reuters va Financial Times xabariga ko‘ra, qonun loyihasida bir necha muhim cheklovlar belgilangan. Unga ko‘ra, burqa va niqob kabi yuzni to‘liq yopuvchi kiyimlarni jamoat joylarida, maktablarda, universitetlarda, savdo markazlarida hamda davlat idoralarida kiyish mutlaqo taqiqlanadi. Mazkur qoidani buzganlarga 300 yevrodan 3 000 yevrogacha jarima solinadi.
Yangi tartibda masjidlar va musulmon tashkilotlari barcha moliyaviy manbalarini ochiqlashi majburiy bo‘ladi. Agar chetdan kelayotgan mablag‘lar “Italiya qadriyatlariga tahdid soluvchi” deb topilsa, ular taqiqlanishi yoki muzlatilishi mumkin.
Shuningdek, qonun loyihasida majburiy nikohlar, diniy bosim o‘tkazish kabi amaliyotlarga qarshi qatʼiy jazo choralari kiritilgan. Hujjat mualliflari bu tashabbusni “Italiya jamiyatini himoya qilish va diniy radikallashuvning oldini olish” deb izohlamoqda.
Ammo inson huquqlari tashkilotlari va musulmon jamoalari buni diniy erkinlikka tajovuz deb baholamoqda. Ularning fikricha, bunday cheklovlar Italiya Konstitutsiyasida kafolatlangan vijdon va eʼtiqod erkinligi prinsiplariga zid.
Hozircha qonun loyihasi parlament muhokamasiga kiritilgan, ammo hukumat koalitsiyasi uni qo‘llab-quvvatlashi kutilmoqda. Meloni hukumati bu orqali “milliy qadriyatlarni himoya qilish va madaniy integratsiyani mustahkamlash”ni maqsad qilganini bildirdi.
