O‘zbekistonda pullik yo‘llardan foydalanish narxlari ma’lum qilindi
Pullik yo‘llar tirbandlikni kamaytirish, vaqtni tejash va haydovchilarga qulaylik yaratishga qaratilgan.
Oliy Majlis Qonunchilik palatasida Transport vazirligi huzuridagi Avtomobil yo‘llari qo‘mitasi vakillari tomonidan mamlakatda pullik avtomobil yo‘llaridan foydalanish narxlari yuzasidan dastlabki ma’lumotlar taqdim etildi.
Qo‘mitaning bosh yuridik maslahatchisi Xasan Umarovning ma’lum qilishicha, hozircha olib borilgan hisob-kitoblarga ko‘ra, 200 kilometr masofani pullik yo‘lda bosib o‘tish taxminan 100 ming so‘m atrofida bo‘ladi. Bu miqdor odatiy yo‘llarda tezlikni oshirish uchun belgilangan jarimaning qariyb yarmiga teng.
“Pullik yo‘llar fuqarolarga vaqtni tejash, xavfsiz va qulay harakatlanish imkonini beradi. Bu nafaqat haydovchilar uchun qulaylik, balki umumiy foydalanishdagi yo‘llardagi transport oqimini kamaytirish orqali tirbandliklarni bartaraf etishga ham xizmat qiladi,” — dedi Umarov.
Shuningdek, investorlarga tasdiqlangan metodologiya doirasida tariflarni mustaqil belgilash huquqi berilishi rejalashtirilmoqda. Bu tizim tabaqalashtirilgan bo‘lib, to‘lovlar yo‘lning umumiy uzunligiga yoki har bir kilometr uchun alohida hisoblanishi mumkin.
