AQSHda portlovchi moddalar ishlab chiqarish zavodida portlash yuz berdi

AQSHning Tennessi shtatida portlovchi moddalar ishlab chiqaruvchi zavodda kuchli portlash sodir bo‘ldi. Mahalliy hokimiyat va ommaviy axborot vositalari xabariga ko‘ra, bir nechta inson halok bo‘lgan, 20 nafarga yaqin xodim yo‘qolgan deb hisoblanmoqda.

 

Hodisa mahalliy vaqt bilan soat 07:45 atrofida Tennessi shtatidagi Baksnort shaharchasi yaqinida yuz bergan. Kuchli portlash natijasida zavod binolaridan biri butunlay vayron bo‘lgan, atrofga chiqindilar sochilib, bir nechta yong‘in kelib chiqqan.

 

Favqulodda xizmatlar dastlab yong‘inlar va ikkinchi portlash xavfi sabab hududga yaqinlasha olmagan. Keyinchalik FBI va ATF vakillari voqea joyiga yetib kelib, sabablarni aniqlash bo‘yicha tergov ishlarini boshlagan.

 

Kompaniya maʼlumotiga ko‘ra, Accurate Energetic Systems harbiy, aerokosmik va sanoat ehtiyojlari uchun turli xil portlovchi moddalar ishlab chiqaradi. Ushbu zavod AQSH armiyasi va dengiz floti bilan uzoq yillik shartnomalarga ega.

 

Portlash paytida atrofdagi uylar ham silkingani maʼlum qilindi. Guvohlar portlash to‘lqinidan oyna va eshiklar titraganini aytgan. Mahalliy hokimiyat organlari aholini tinchlantirish va jabrlangan oilalarga yordam ko‘rsatish ishlarini tashkil qilmoqda.

 

Sobiq harbiy xodimlar va mahalliy fuqarolarning taʼkidlashicha, zavodda avval ham kichik miqyosdagi portlashlar sodir bo‘lgan, ammo bu galgi hodisa ko‘lami bo‘yicha so‘nggi yillardagi eng yirigi hisoblanadi.

 

Dastlabki maʼlumotlarga ko‘ra, bu texnik nosozlik yoki xavfsizlik qoidalarining buzilishi natijasi bo‘lishi mumkin.