Xorazmda terrorchilik harakatini moliyalashtirgan erkak 5 yilga qamaldi
U Rossiyada ishlab yurgan vaqtida taqiqlangan tashkilot hisob raqamiga pul o‘tkazib kelgan.
Xorazm viloyatida terrorchilik faoliyatini moliyaviy jihatdan qo‘llab-quvvatlagan shaxsga nisbatan sud hukmi chiqdi.
Davlat xavfsizlik xizmati va huquqni muhofaza qiluvchi organlar tomonidan o‘tkazilgan tezkor tadbirlar natijasida aniqlanishicha, Xorazm viloyatida yashovchi fuqaro Rossiyada bo‘lgan davrida taqiqlangan “Tavhid va jihod katibasi” nomli xalqaro terrorchilik tashkiloti a’zolari bilan aloqa o‘rnatgan. U mobil ilovalar orqali ushbu tashkilot hisob raqamlariga bir necha bor pul o‘tkazish yo‘li bilan ularning faoliyatini moliyalashtirgan.
Sud tergovi jarayonida to‘plangan dalillar asosida Tuproqqal’a tuman sudi mazkur shaxsni Jinoyat kodeksining 155-3-moddasi (“Terrorizmni moliyalashtirish”) bo‘yicha aybdor deb topdi va unga besh yil muddatga ozodlikdan mahrum etish jazosi tayinladi.
