Toshkentda 17 yoshli o‘quvchi sinfdoshining o‘limiga sababchi bo‘ldi
U akasining avtomobilini ruxsatsiz haydab chiqib, yo‘l-transport hodisasi sodir etgan.
Toshkent shahrida 17 yoshli maktab o‘quvchisi tomonidan sodir etilgan o‘lim bilan yakunlangan yo‘l-transport hodisasi yuzasidan sud hukmi chiqdi.
Jinoyat ishi materiallariga ko‘ra, o‘smir 2025-yil 25-mart kuni akasiga tegishli “Tracker” rusumli avtomobilni ruxsatsiz olib chiqib, soatiga 137 kilometr tezlikda harakatlanib, boshqaruvni yo‘qotgan. Natijada avtomobil ikki transport vositasi va ustunga urilgan. Hodisa oqibatida uning sinfdoshi voqea joyida halok bo‘lgan.
Sud majlisida sudlanuvchi qilgan ishidan pushaymonligini bildirib, “bu Ramazon hayiti tongida sodir bo‘lgan, xatoga yo‘l qo‘ydim”, degan.
Sud qaroriga ko‘ra, u Jinoyat kodeksining 266-moddasi 2-qismi bilan aybdor deb topildi va dastlab to‘rt yil muddatga ozodlikdan mahrum qilish jazosi tayinlandi. Normativ huquqiy me’yorlarni qo‘llagan holda, sud hukmni yengillashtirib, uch yil muddatga shartli jazo belgiladi.
