Toshkentda Turkiy universitetlar ittifoqining 8-Bosh Assambleyasi bo‘lib o‘tdi
Unda 7 ta oliygohni ittifoqqa qabul qilish rejalashtirilgani ma’lum qilindi.
Bugun, 15-oktabr kuni Toshkent xalqaro universiteti (Tashkent International University) raisligida Turkiy davlatlar tashkiloti huzuridagi "Turkiy universitetlar ittifoqi (TÜRKÜNİB)"ning 8-Bosh Assambleyasi bo‘lib o‘tdi.
Tadbirda Turkiy davlatlar tashkiloti (TDT) va TURKSOY rahbariyati, Oliy ta’lim, fan va innovatsiyalar vazirligi vakillari, Turkiy Akademiya hamda TÜRKÜNİBga a’zo oliy ta’lim muassasalari rahbarlari ishtirok etdi.
Assambleyada Azerbayjon, Turkiya, Qozog‘iston, Qirg‘iziston, Vengriya, Shimoliy Kipr va O‘zbekistondan jami 69 ta universitet vakillari qatnashdi. Tadbirda ittifoqqa yangi universitetlarni qabul qilish, “Orhun” almashinuv dasturini takomillashtirish, doimiy kotibiyat va maxsus dastur jamg‘armasini tashkil etish masalalari muhokama qilindi.
Shuningdek, O‘zbekiston tomonidan ilgari surilgan “Turkiy ilm-fan va innovatsiyalar kunlari”ni o‘tkazish tashabbusi ham kun tartibiga kiritildi.
O‘zbekiston Respublikasi Oliy ta’lim, fan va innovatsiyalar vaziri Qo'ng'irotboy Sharipov o‘z nutqida yig‘ilish ishtirokchilarini O‘zbekiston hukumati nomidan samimiy tabriklab, ushbu assambleya Turkiy dunyo oliy ta’limi va ilm-fan sohasidagi hamkorlikni mustahkamlashda muhim ahamiyat kasb etishini ta’kidladi.
“Turkiy davlatlar o‘rtasidagi do‘stlik va qardoshlik aloqalarini yanada mustahkamlash, yosh avlodni zamonaviy bilim va innovatsion tafakkur ruhida tarbiyalash — bizning umumiy maqsadimizdir”, — dedi vazir.
U, shuningdek, bugungi kunda O‘zbekistonning 11 ta oliygohi TÜRKÜNİB a’zosi ekanini, yana 7 ta oliygohni ittifoqqa qabul qilish rejalashtirilganini ma’lum qildi.
O‘zbekiston va Turkiya, Ozarbayjon, Qozog‘iston, Qirg‘iziston hamda Vengriya o‘rtasidagi oliy ta’lim hamkorligi, qo‘shma forumlar va yangi ta’lim loyihalari muvaffaqiyatli davom etayotgani qayd etildi.
Assambleya yakunida Tashkent International University hududida O‘zbekiston universitetlari ko‘rgazmasi va U2U (University to University) formatidagi uchrashuvlar tashkil etildi.
Mazkur Assambleya Turkiy davlatlar o‘rtasida o‘zaro hamkorlikni chuqurlashtirish, ta’lim va ilm-fan sohasida yangi istiqbolli loyihalarni boshlab berish yo‘lida muhim qadam bo‘ldi.
