2028-yilda Samarqandda Xalqaro astronavtika kongressi bo‘lib o‘tadi
Shavkat Mirziyoyev yangi iqtisodiy imkoniyatlarni aniqlashga qaratilgan kosmik loyihalar taqdimoti bilan tanishdi.
16-oktabr kuni Prezident Shavkat Mirziyoyev kosmik monitoring orqali iqtisodiy imkoniyatlarni aniqlash va tarmoqlarda ushbu texnologiyalardan foydalanish samaradorligini oshirish masalalari yuzasidan taqdimot bilan tanishdi.
Taqdimotda Raqamli texnologiyalar vazirligi huzuridagi Kosmik tadqiqotlar va texnologiyalar agentligi tomonidan amalga oshirilayotgan ishlar va istiqboldagi rejalar muhokama qilindi. Aytib o‘tildiki, mamlakatimizda geologiya, yer resurslari va ekologiya sohalarida davlat kosmik monitoringi tizimli yo‘lga qo‘yilmoqda. Yil boshidan buyon 2 mingdan ortiq noqonuniy kon ishlatish holatlari sun’iy yo‘ldoshlar orqali aniqlangan.
Shuningdek, Prezident noqonuniy qurilishlarni aniqlash, bo‘sh turgan yerlarni iqtisodiy faoliyatga jalb etish hamda kosmik tahlillarni iqtisodiyot tarmoqlariga keng joriy etish zarurligini ta’kidladi. Shu maqsadda axborot platformalarini integratsiyalash va tezkor nazorat tizimini yaratish topshirig‘i berildi.
Kosmik texnologiyalar yordamida o‘rganilgan oltita hududda 300 gektarga yaqin bo‘sh yerlar aniqlandi. Kelgusi yilda barcha tuman markazlarida bu boradagi ishlarni yakunlash belgilandi.
Taqdimotda, shuningdek, sun’iy intellekt orqali kosmik ma’lumotlarni tahlil qilish, o‘rmon holatini kuzatish, metan sizib chiqishini aniqlash, quyosh panellari va infratuzilma samaradorligini baholash kabi innovatsion yo‘nalishlar muhokama qilindi.
Davlat rahbari 2028-yilda Samarqandda bo‘lib o‘tadigan Xalqaro astronavtika kongressiga puxta tayyorgarlik ko‘rish bo‘yicha topshiriqlar berdi.
