O‘zbekistonda haydovchilar uchun yagona elektron guvohnoma joriy etildi
Endilikda avtomaktab bitiruvchilariga raqamlashtirilgan sertifikatlar taqdim etiladi.
2025-yil 15-oktyabrda Vazirlar Mahkamasining 642-sonli qarori bilan haydovchilarni tayyorlash va qayta tayyorlash jarayonini raqamlashtirish bo‘yicha yangi tartib joriy etildi.
Qarorga ko‘ra, o‘quv tashkilotlarini muvaffaqiyatli tamomlagan va imtihonlardan o‘tgan nomzodlarga yagona namunadagi elektron guvohnoma beriladi. Ushbu hujjat "e-avtotalim.uz" axborot tizimi orqali avtomatik shakllantiriladi va haydovchilik guvohnomasini olish uchun imtihon o‘tkazuvchi tadbirkorlik subyektlariga real vaqt rejimida taqdim etiladi. Elektron guvohnoma olish uchun hech qanday yig‘im olinmaydi.
Shuningdek, avtomaktab bitiruvchilari o‘qishni tamomlaganlik va davlat imtihonidan muvaffaqiyatli o‘tganliklarini tasdiqlovchi elektron sertifikatga ega bo‘ladi. Qayta tayyorlash kurslarini tamomlagan shaxslar ham ushbu hujjatni oladi.
Adliya vazirligi ma’lumotiga ko‘ra, elektron guvohnomalar orqali davlat imtihonlarini o‘tkazuvchi muassasalar real vaqt rejimida tekshiruv o‘tkazishi mumkin, bu esa qog‘oz sertifikatlarga bo‘lgan ehtiyojni yo‘q qiladi va imtihonlarga tayyorlanmagan shaxslarning kirishining oldini oladi.
Yangi tizim haydovchilik ta’limini samaraliroq, shaffof va raqamlashtirilgan shaklda tashkil etish imkonini beradi.
